काठमाडौँ, ११ साउन । नेकपा एमालेका महासचिव शंकर पोखरेलले १५५ केजी सुन प्रकरणमा संलग्न रहेको कम्पनीको गोदाममा छापामार्न किन १० दिन लगाएको भनि सरकारसँग प्रश्न गर्नुभएको छ ।
गोदाममा १० दिनपछिमात्र छापामार्नुमा अर्को षड्यन्त्र भएको हुन सक्ने आशंका व्यक्त गर्दै महासचिव पोखरेलले १० दिन पछिमात्र छापामार्नु अनुसन्धानको प्रकृयामाथि चलखेल हुन सक्ने संकेत गर्नुभयो । उहाँले उक्त विषयमा संसद अझ बढी गम्भीर र जिम्मेवार हुनुपर्ने धारणा राख्नुभएको छ ।
उहाँले आफ्नो सामाजिक सञ्जालमा भन्नुभएको छ, ‘१० दिन पछि सुनतस्करी गर्ने मजदुरका नाममा दर्ता भएको कम्पनीको गोदाममा छापा मार्दा फेला परेको व्रेक सु मा सुन फेला पर्ने कुनै सम्भावना रहदैन होला । तर व्रेक सु को भिडियो फुटेज र तौल समेतका आधारमा कति सुन तस्करी भएको रहेछ भन्ने अनुमान भने गर्न सकिन्छ होला । तर कम्पनी दर्ता नै जालसाजीपूर्ण रहेको तथ्य सार्वजनिक भएको स्थितिमा गोदाममा छापामार्न दस दिनको समय किन लगाइयो भन्नेको प्रश्नको घेरामा अनुसन्धान प्रकृया अवश्य परेको छ । अहिलेसम्मको ठुलो मानिएको सुन तस्करीको विषय संसदमा प्रवेश भएको छ । यस्तो विषयमा संसद अझै गम्भीर र जिम्मेवार हुन सक्नु पर्दछ ।’
