काठमाडौँ, २० असार । प्रमुख प्रतिपक्षी नेकपा एमालेले प्रधानमन्त्री पुष्पकमल दाहाल प्रचण्डको राजीनामा मागेको छ ।
बुधबार संसदको बैठक सुरु भए लगत्तै समय लिएर बोलेका एमाले सांसद रघुजी पन्तले आफूलाई प्रधानमन्त्री बनाउन प्रितम सिंह पटक पटक दिल्ली गएको भन्ने प्रधानमन्त्री प्रचण्डको अभिव्यक्तिमा आपत्ति जनाए । उनले अघि भने, ‘नैतिकताका आधारमा प्रधानमन्त्री पदमा बस्नु उपयुक्त हुन्न, उहाँले राजीनामा गर्नुस् ।’
प्रधानमन्त्रीले राजीनामा नदिएसम्म संसद चल्न नदिने उनले बताए । उनले नेपालका प्रधानमन्त्री लेण्डुप दोर्जे जस्तै भएको समेत बताए । नेपालको प्रधानमन्त्री नेपाली जनताप्रति उत्तरदायी हुनुपर्नेमा जोड दिँदै उनले प्रचण्ड नेपाल र नेपालीको लागि नभई दिल्लीको लागि मात्र भएको भन्दै कडा शब्दमा आलोचना गरे ।
