काठमाडौँ, २० असार । नेकपा एमालेको स्थायी कमिटी सदस्य राजेन्द्र गौतमले प्रधानमन्त्री पुष्पकमल दाहाल प्रचण्डले जनताको मतको खिल्ली उडाएको बताउनुएको छ ।
प्रधानमन्त्री प्रचण्डको विवादास्पद अभिव्यक्तिलाई लिएर सामाजिक सञ्जालमा समेत कडा आलोचना भइरहेको छ । मंगलबार प्रितम सिंहमाथि किरणदीप सन्धुले लेखेको पुस्तक ‘रोड्स टु द भ्याली स् द लिगेसी अफ सरदार प्रितम सिंह इन नेपाल’ विमोचन कार्यक्रममा प्रधानमन्त्री प्रचण्डले भन्नुभएको थियो, ‘उहाँ (सिंह)ले एक पटक मलाई प्रधानमन्त्री बनाउन धेरै मिहिनेत गर्नुभयो । धेरैचोटि दिल्ली जानु पनि भयो । काठमाडौँमा नेताहरू–साथीहरूसँग लगातार छलफल गर्नुभयो ।’
एमालेका प्रचार तथा प्रकाशन विभाग प्रमुख समेत रहनुभएका गौतम प्रधानमन्त्री दाहालको प्रितम सिंहप्रतिको भक्ति लाचारी र आत्मसमर्पणवादको भद्दा नमुना भएको टिप्पणी गर्नुभएको छ । नेता गौतमले आफ्नो सामाजिक सञ्जालमा भन्नुभएको छ, ‘प्रितम सिंहप्रति प्रचण्डको भनाई : मालिकप्रति स्पष्ट भक्ति, प्रधानमन्त्रीको लाचारी, आत्मसमर्पणवादको भद्वा नमुना । यो सरकारको चावी कहाँ रहेछ ? सार्वभौम जनताको मतको खिल्ली उठाइयो । संविधान र ,संसदको माखोल उठाइयो । धन्य ।’
प्रचण्डको उक्त अभिव्यक्तिलाई लिएर एमाले संसदीय दलको बैठकले पनि प्रतिनिधिसभाको बैठक अवरुद्ध गर्ने निर्णय गरेको छ । बैठकले प्रधानमन्त्री पुष्पकमल दाहाल प्रचण्डले प्रधानमन्त्रीको हैसियतमा बस्ने सबै आधार गुमाएको निष्कर्ष निकालेको छ ।
