महाेत्तरी, २५ चैत । महोत्तरीको जलेश्वर कारागारका एक कैदी आज शुक्रवार दिउँसो अस्पतालबाट फरार भएका छन् ।
जलेश्वर कारागारका कैदी जिल्लाकै लोहारपट्टी नगरपालिका–९ खुट्टापिपराढी बस्ने २३ वर्षीय कृष्ण यादव जनकपुरमा रहेकाे आर्य अस्पतालबाट फरार भएका जिल्ला प्रहरी कार्यालयका प्रहरी नायब उपरीक्षक दिलिपकुमार गिरीले जानकारी दिनुभयाे ।
गोडामा समस्या आएर पाँच कैदीका साथ उपचारका लागि जनकपुर गएका कैदी यादव अस्पतालको झ्याल फाेरेर फरार भएका थिए । धनुषाको जनकपुर उपमहानगरपालिका–८ बस्ने अर्जुन साहको हत्या गरेको आरोपमा २०७९ साल भदौ २५ गतेदेखि उनी पुर्पक्षका लागि कारागारमा थिए । फरार कैदी यादवको महोत्तरी र धनुषाका संयुक्त प्रहरी टोलीले खोजी गरिरहेको छ । रासस
