रौतहट, १४ बैशाख । नेकपा माओवादी केन्द्र मधेस प्रदेश कमिटी सदस्य सुधीर यादवसहितका कार्यकर्ताले पार्टी परित्यागको घोषणा गर्नुभएको छ ।
रौतहटको गरुडामा बुधबार पत्रकार सम्मेलनको आयोजना गरी उहाँहरूले पार्टी परित्यागको घोषणा गर्नुभएको हो । पत्रकार सम्मेलनमा २०५९ सालदेखि माओवादी प्रदेश कमिटीमा रहेको तर नेतृत्वको स्वार्थको कारण पार्टीले सम्पूर्ण सिद्धान्त छोडेको यादवले गुनासो गर्नुभयो । माओवादीको रणनीतिक उद्देश्य भनेको समाजवाद, साम्यवाद स्थापना नभएसम्म हतियार फाल्नु पर्ने अवस्था सिर्जना नहुने उल्लेख गर्दै उहाँले अध्यक्ष प्रचण्डको कारण हतियार फालिएको आरोप लगाउनुभयो ।
माओवादी जनयुद्धको उपलब्धि शून्य भएको जिकिर गर्दै उहाँले माओवादी पार्टीको उद्देश्य अनुसार निर्वाचन प्रणाली अनुकूल नभएको बताउनुभयो । यही बुर्जुवा निर्वाचन प्रणालीमा अध्यक्ष प्रचण्ड रुमली रहेको जिकिर गर्दै उहाँले अब स्वतन्त्र वामपन्थीको रूपमा जीवन बिताउने बताउनुभयो ।
