बुटवल, ३ फागुन । रुपन्देहीको बुटवल उपमहानगरपालिका–१२ मिलन चोकमा मोटरसाइकल दुर्घटना हुँदा दुई जनाको मृत्यु भएको छ भने एकजना गम्भीर घाइते भएका छन् ।
इलाका प्रहरी कार्यालय बुटवलका अनुसार आज बिहान तीन जना चढेको लु ६० प ३६५२ नम्बरको मोटरसाइकल अनियन्त्रित भएर पल्टिंदा मोटरसाइकलमा पछाडि सवार गैडहवा गाउँपालिका ९ हात्तीबजारका २० वर्षीय प्रेम रुचाल र सोही ठाउँका २० वर्षीय राहुल थापाको मृत्यु भएको हो ।
दुबै जनाको उपचारको क्रममा बुटवलस्थित लुम्बिनी प्रादेशिक अस्पतालमा मृत्यु भएको हो । दुर्घटनामा गम्भीर घाइते भएका मोटरसाइकल चालक रुपन्देहीकै २१ वर्षीय विमल रानाको सोही अस्पतालमा उपचार भइरहेको छ ।
