नेपालगञ्ज, १ मंसिर । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले नेपाली कांग्रेस बुढो भएको उल्लेख गर्दै अहिले कांग्रेस चार हात टेकेर मात्र हिँडिरहेको दावी गर्नुभएको छ ।
बुधबार नेपालगञ्जमा विभिन्न पार्टीका कार्यकर्तालाई पार्टी प्रवेश गराउने कार्यक्रमलाई सम्बोधन गर्दै अध्यक्ष ओलीले नेपालको राजनीतिक इतिहासमा पुरानो इतिहास बनाएको काँग्रेस अहिले हराउँदै र बिलाउँदै गएको बताउनुभयो । अध्यक्ष ओलीले काँग्रेस कहाँ गयो भन्ने प्रश्न गरिरहेको समेत उल्लेख गर्नुभयो ।
उहाँले भन्नुभयो, ‘काँग्रेस त प्रचण्ड पथमा गयो गयो, काँग्रेस त प्रचण्ड पथमा लागिसक्यो । काँग्रेसका कार्यकर्ता के हेरेर अझै काँग्रेसमा बसिरहेको भन्दै प्रश्न गरिरहेका छन् । कहाँ छ विपी कोइरालाको काँग्रेस ? गणेशमानको काँग्रेस, कहाँ छ कृष्णप्रसाद भट्टराई हुँदाको काँग्रेस ? अहिले त प्रचण्डले जे अह्रायो त्यहीँ ।’
काँग्रेसलाई अहिले एउटा प्रधानमन्त्रीको कुर्सी भए पुगेको भन्दै अव काँग्रेस एक्लै एमालेसँग चुनाव लड्न नसक्ने दावी गर्दै अध्यक्ष ओलीले भन्नुभयो, ‘चार हात टेकेर हिँड्छ काँग्रेस । चुनावसम्म गठबन्धन रे, म काँग्रेसलाई सोध्न चाहान्छु एमालेसँग एक्लै चुनावमा लड्ने दम छ रु सक्छ एमालेसँग एक्लै लड्न काँग्रेसले रु काँग्रेस हिजोको छैन बुढो भयो । अव काँग्रेस अरूसँग तालमेल मिलाउँदा मिलाउँदै कहाँ पुग्ने हो थाहा छैन ।’
