सल्यान, २४ साउन । सल्यानमा बाढीले बगाएर एकजनाको मृत्यु भएको छ ।
प्रहरीका अनुसार छत्रेश्वरी गाउँपालिका–४, जुटढुंगा बस्ने ३२ वर्षीया डिल्ली ओलीका छोरा १२ वर्षीय ओमकार ओलीको गगनपानी खोला तर्ने क्रममा बगाएर शनिबार साँझ मृत्यु भएको हो ।
आमासँग वनमा गाईगोरु चराई घर फर्कँदै गर्दा गगनपानी खोला तर्ने क्रममा अविरल वर्षाको कारण बाढी आई बगाउँदा घटनास्थलदेखि २०० मिटर टाढा ओमकारको शव फेला परेको हो । यस्तै, खोलानजिकै बेहोस अवस्थामा रहेकी उनकी आमालाई इलाका प्रहरी कार्यालय लुहाम प्रहरीले उद्धार गरी उपचारको लागि स्वास्थ्यचौकी पठाएको र हाल अवस्था सामान्य रहेको जनाइएको छ ।
