माधव समूहले संसदीय इतिहासमै कलंकको टीका लगाए, कारबाही हुन्छ: प्रमुख सचेतक भट्टराई

काठमाडौँ, ३० वैशाख । नेकपा एमालेको विवाद निरुपणमा पार्टी अध्यक्ष केपी शर्मा ओलीले बेवास्ता गरेपछि वरिष्ठ नेता झलनाथ खनाल तथा माधवकुमार नेपाल पक्षले पार्टीबाटै बाहिरिने कि सांसद पदबाट राजीनामा दिने भन्नेबारे छलफल थालेको छ । सर्वोच्च अदालतको फैसलाअनुसार पार्टीलाई २०७५ जेठ २ गतेको अवस्थाबाट सुरु गर्नुपर्ने माग ओलीले नसुनेपछि नेपाल समूह पार्टीबाटै बाहिरिने वा सांसद पदबाट सामूहिक राजीनामा दिएर आन्तरिक संघर्ष गर्ने भन्नेबारे छलफलमा जुटेको हो ।

एमाले अध्यक्ष ओली नेतृत्वमा रहेको सरकारले विश्वासको मत आर्जन गर्न नसकेपछि अहिले नयाँ सरकार गठनको रस्साकस्सी चलिरहँदा नेपाल पक्ष निर्णायक स्थानमा छ । नेपाल पक्षका सांसदले राजीनामा दिए विपक्षी दल नेपाली कांग्रेसको नेतृत्वमा सरकार गठनका लागि बल पुग्नेछ तर जनता समाजवादी पार्टी दुई धारमा बाँडिएको अवस्थामा तत्कालै राजीनामा दिनु घातकमात्रै हुने तर्क पनि सो समूहमा उठेको छ ।

विश्वासको मतमा प्रतिनिधिसभामा मतदान हुनुअघि प्रधानमन्त्री ओलीले राजीनामा नदिनु, अन्य विकल्प अपनाउनु भन्ने सन्देश पठाएपछि त्यसकै आधारमा राजीनामाबाट पछि हटेको नेपाल पक्षले पार्टी एकताका विषयमा तत्काल छलफल हुने अपेक्षा गरेको थियो । तर बितेका दुई दिनमा ओली पक्षले उनीहरूसँग संवाद नै गर्न नचाहेपछि बुधबार नेपाल पक्षका नेता घनश्याम भुसाल र भीम रावलले सामाजिक सञ्जालमार्फत असन्तुष्टि व्यक्त गरेका छन् । उनीहरूले अब नयाँ विकल्पतिर जानुपर्ने आशय व्यक्त गरेका छन् । भुसालले आत्मसमर्पण गर्नु क्रान्तिकारी गद्दारी हो भनेका छन् भने नेता रावलले राजीनामा दिएर ओली सरकार हटाउने जनाएका छन् । तर राजीनामा कहिले कसरी दिने भन्नेबारेमा रावलले खुलाएका छैनन् ।

नेपाल समूहभित्रै एकथरी भने राजीनामाभन्दा पनि पार्टी एकताका पक्षमा सोच्नुपर्नेमा जोड दिन्छन् । मंगलबार सम्पन्न नेपाल पक्षको स्थायी कमिटी बैठकमा पनि अधिकांशले पार्टी एकता बचाउनुपर्ने बताएका थिए । तर यसका लागि ओलीबाट पहल हुनुपर्ने उनीहरूको भनाइ थियो । ओलीबाट भने कुनै पनि प्रकारको संवाद सुरु नभएपछि पार्टी एकीकरणका पक्षमा रहेका नेतासमेत निराश बनेका छन् । उता ओली समूहमा पनि नेपाल पक्षलाई पार्टीभित्रै राखिराखे सधैंका लागि झमेला हुने तर्क गर्नेहरू पनि छन् । ओली पक्षका सुवास नेम्वाङ, विष्णु पौडेल, प्रदीप ज्ञवालीलगायतले पार्टीलाई एकताबद्ध बनाउँदा उपयुक्त हुने सल्लाह दिए पनि ओलीले बेवास्ता गरेका छन् ।

ओली पक्षले विश्वासको मतमा मतदान हुँदा संसद्मा अनुपस्थित नेपाल समूहका सांसदलाई कारबाही पनि गरेको छैन । ‘उहाँहरूलाई अहिले कारबाही हुन्न । पार्टी एकताको गीत गाउँदै हुनुहुन्छ, हेरौं न कत्तिको इमानदार भएर लाग्नुहुन्छ, यहीबीचको गतिविधिले थाहा भइहाल्छ’, ओली पक्षका एक नेताले भने । प्रमुख सचेतक विशाल भट्टराईले भने कारबाहीको विषयमा छलफल भइरहेको बताएका छन् । ‘संसदीय इतिहासमै कलंकको टीका लगाएपछि जरुर कारबाही हुन्छ’, उनले भने ।

सामूहिक राजीनामाको प्रसंग प्रतिनिधिसभाको गणितले पनि रोकेको नेपाल पक्षधर एक नेताले बताए । ‘अब सरकार बनाउने कांग्रेसले हो । पहिला कांग्रेसको पक्षमा १२५ सिट हुने ग्यारेन्टी भएपछि मात्रै हाम्रो राजीनामाको अर्थ हुन्छ र नयाँ सरकार बन्छ । कांग्रेस पक्षमा बहुमत पुगेन भने राजीनामा दिनुको अर्थ छैन । त्यसकारण परिस्थिति हेरेर मात्रै निर्णय लिने हो’, नेपाल पक्षका एक स्थायी कमिटी सदस्यले भने । उनका अनुसार अहिलेको अवस्थामा छिनछिनको परिस्थितिलाई हेरेर निर्णय लिनुपर्ने भएकाले जति बेला पनि कठोर निर्णय गर्ने अवस्था आउन सक्छ । यो समाचार आजको नागरिक दैनिकमा छ ।

प्रतिक्रिया दिनुहोस्

संबन्धित समाचार

दमौली, ९ कार्तिक । तनहुँको ऋषिङ गाउँपालिकाले वर्षाले घर भत्किएका गाउँवासीलाई राहत प्रदान गर्ने भएको छ । सोमबार बसेको गाउँ

काठमाडौँ, ९ कार्तिक । नेपाल राष्ट्र बैंकले मंगलबार तोकेको बिनीमय दर अनुसार यस प्रकार रहेको छ । Exchange Rate for

काठमाडौँ, ९ कार्तिक । नेपाल वायु सेवा निगमले काठमाडौँ–ताप्लेजुङको उडान कटौती गरेको छ । जिल्लाको सुकेटार विमानस्थलमा प्रत्येक साताको चार दिन

काठमाडौँ, ८ कार्तिक । एनआईसी एशिया बैंक लिमिटेडको संचालक समितिको आज सम्पन्न ५११ औं बैठकको निर्णयानुसार आ.व. २०७७/७८ को मुनाफा

जनताको एउटै बोलि We love k.p oli भन्दै...... प्रधानमन्त्री केपि शर्मा ओलिको समर्थनमा बुटवलमा निकालिएको बृहत मोटरसाइकल -यालि.........।

Posted by Thapa Dinesh on Thursday, February 11, 2021