काठमाडौँ, २ फागुन । नेपाली कांग्रेसले उत्तरी छिमेकी चीनसँगको केरुङ नाका तत्काल खुलाउन माग गरेको छ । कांग्रेस प्रवक्ता विश्वप्रकाश शर्माले तत्काल केरूङ नाका खुलाका लागि आवश्यक पहल गर्न सरकारसँग माग गर्दै आज विज्ञप्ति जारी गरेका छन् ।
“चीनको वुहानबाट कोरोना भाइरसको संक्रमण फैलिएलगत्तै अन्तर्राष्ट्रिय सीमा नाकाहरुमा प्रवेशमा कडाइ र आवागमन बन्द गरिनु तत्कालको परिस्थितिको बाध्यता र आवश्यक कदम थियो,” विज्ञप्तिमा भनिएको छ, “तर, तुलनात्मक रुपले स्थिति सहज बनेको अवस्थामा पनि उत्तरी सीमाको प्रमुख व्यापारिक नाका केरुङमा नागरिक र व्यवसायीले दुःख पाइरहेको विवरण निरन्तर प्राप्त भइरहेको हुँदा नेपाली कांग्रेस यसप्रति सरकारको गम्भीर ध्यानाकर्षण गराउँछ ।”