उदयपुर, २२ असोज । सिद्धिचरण लोकमार्ग अन्तर्गत कटारी–वेतेनी सडकखण्डमा कन्टेनर दुर्घटना हुँदा दुई जनाको घटनास्थलमै मृत्यु भएको छ ।
बुधबार बेलुका ओखलढुंगाबाट उदयपुरको कटारीतर्फ आउँदै गरेको ना.५.ख. नम्बरको कन्टेनर सिरिसेस्थित दमाभीरमा दुर्घटना हुँदा कटारी-८ का मिनबहादुर रानामगर र गोलबजार नगरपालिका सिरहाका राकेश यादवको मृत्यु भएको इलाका प्रहरी कार्यालय कटारीले जनाएको छ ।
कन्टेर करिब ५ सय मिटर तल खसेर ठुलो ढुङ्ग्गाले थिचिएको अवस्थामा रहेको र मृतकको शरीरलाई उद्धार गर्न प्रहरीलाई ६ घण्टा लागेको प्रहरीले जनाएको छ । दुर्घटनामा अन्य दुईजना गम्भीर घाइते भएका छन् । गम्भीर घाइते भएका चालक झापा दमक घर भएका योगेन्द्र दाहाल र वराहाक्षेत्र नगरपालिका सुनसरीका विजय भुजेललाई थप उपचारका लागि राती नै विराटनगर पठाइएको प्रहरीले जनाएको छ ।
