रौतहट, १५ साउन । रौतहटमा ३३ केभी प्रसारण लाइनको तार चुडिएर करेन्ट लाग्दा एकजनाको मृत्यु भएको छ ।
करेन्ट लागेर गौर-४ की ७० वर्षीय शान्ती देवी पाण्डेको मृत्यु भएको जिल्ला प्रहरी कार्यालय रौतहटले जनाएको छ । बिहान चिया खान पसलमा गएकी वृद्धा बाटो काट्ने क्रममा करेन्टको चपेटामा परेकी थिइन् । सोही स्थानमा करेन्ट लागेर दुई साँढेको समेत मृत्य भएको छ ।
गौर-चन्द्रपुर जोड्ने मुख्य सडक नजिकै उच्च भोल्टेजको करेन्ट प्रवाह भइरहेको तार चुडिएर सडकमा खसेको थियो । स्थानीयवासीका अनुसार उनीहरुले नेपाल विद्युत प्राधिकरणको गौर शाखा र सबगढामा रहेको सबस्टेशनमा समेत फोन गरेर जानकारी दिन खोजेका थिए । पटक-पटक फोन गर्दा पनि दुवै कार्यालयको फोन कसैले नउठाउँदा महिलालाई करेन्ट लागेर मृत्यु भएको स्थानीयले बताएका छन् ।
नेपाल विद्युत प्राधिकरणको चरम लापरवाहीका कारण मृत्यु भएको भन्दै स्थानीयले लापरवाही गर्ने कर्मचारीलाई कारवाही हुनुपर्ने माग गरेका छन् ।