धनुषा, २८ असोज । धनुषाबाट नक्कली सुन बेचेर ठग्ने तीन जना भारतीय नागरिकलाई प्रहरीले पक्राउ गरेको छ ।
सोमबार राति सुन जस्तो देखिने धातुलाई सुन हो भनी क्षिरेश्वरनाथ नगरपालिका–५ सखुवा चोकस्थित बिकेटी ज्वेलर्समा बिक्री गर्ने ५५ वर्षीय राम कुमार बर्मा, ६० वर्षीया शान्ति देवी र ३५ वर्षीया सिमा देवीलाई प्रहरीले पक्राउ गरेको हो ।
सुन जस्तो देखिने धातुबाट बनेका कानको रिङ ६ थान, टप ६ थान, औंठी १ थान र लकेट १ थान उक्त पसलमा विक्री गरेका थिए । उक्त सामान नक्कली सुनबाट बनेको थाहा पाउनासाथ पसलले प्रहरीलाई खबर गरेका थिए ।
पक्राउ परेका उनीहरूमाथि थप अनुसन्धानभइरहेको प्रहरीले जनाएको छ ।
