काठमाडौँ, २४ असोज । समाजवादी पार्टीका अध्यक्ष तथा पूर्वप्रधानमन्त्री डा. बाबुराम भट्टराईले चिनियाँ राष्ट्रपति सी जिनपिङको अनावश्यक गतिविधि नगरी उच्च सम्मान गर्न सबैमा आग्रह गर्नुभएको छ ।
सामाजिक सञ्जालमा सी भ्रमणको पूर्वसन्ध्यामा पोस्टर च्यात्नेलगायतका गतिविधि भइरहेकोमा डा. भट्टराईले अतिथि देवो भवः को नेपाली संस्कार स्मरण गराउँदै सीको अनादर नगर्न सबैसँग आग्रह गर्नुभएको छ ।
ट्विटमार्फत सीको स्वागत गर्दै भट्टराईले लेख्नुभएको छ, ‘अतिथि देवो भवः हामी नेपालीको संस्कार हो । २३ वर्षपछि हुन लागेको उत्तरी छिमेकी चीनका महामहिम राष्ट्रपति सी जिनपिङको भ्रमणको क्रममा कुनै अनादर झल्कने अभिव्यक्ति नदिऊँ । कसैले सामाजिक मिडियामा दिइहाले त्यसलाई शेयर नगरौं ।’
