काठमाडौं, २६ फागुन । प्रधानमन्त्री केपी शर्मा ओलीले शंका, षड्यन्त्र र धोकामाथि विश्वास नरहेको बताएका छन ।
आइतबार काठमाडौंमा किसान आयोगले आयोजना गरेको कार्यक्रममा बोल्दै प्रधानमन्त्री ओलीले सरकार र राउत समूहबीच भएको सहमतिमाथि गरिएको आशंकाप्रति असन्तुष्टि जनाएका छन ।
उनले भने, ‘पृथकतावाद छाडेर मूलधारमा आउनु र ल्याउन सफलता र सकारात्मक होइन भने के हो ? ‘शंका छ रे ? भन्ने कुरा भनिराखेको छ उसले । फेरि शंका छ रे ? शंका, षड्यन्त्र, धोकामाथि मेरो विश्वास छैन ।’
प्रधानमन्त्री ओलीले नेपालमा अब पृथकतावादी आन्दोलन समाप्त भएको बताए । उनले भने, ‘अब कुनै पृथकतावाद छैन, पृथकतावादी आन्दोलन, समूह, संगठन केही छैन नेपालमा ।’ केही-केही मान्छे कुनाकाप्चामा छटपटाएको तर, त्यो विरालो रिसायो भने खाँबो चिथोर्छ भने जस्तै मात्र भएको बताएका छन ।